بهادر نادری
تماس با من
پروفایل من
نویسنده (های) وبلاگ بهادر نادری
آرشیو وبلاگ
      بلوچستان (شعر ، داستان ، عکس ، مطلب و مقاله (بلوچی و فارسی))
گندءُ نند (مصاحبه) گوں واجه فتیح محمد شهلی بر ایرانشهرءِ شورای شهرءِ مستر(رییس) نویسنده: بهادر نادری - ۱۳۸٩/۱۱/۱٠

شهلی بر:

یکے چه مئے فرهنگی لوٹاں مئے زبانءُ فرهنگ اِنت که اے چیز وت مئے نظامءَ منّ اِتگ ءُ قانون اساسیءِ تهءَ یهتگءُ...

گندءُ نند: عبدالوهاب ایران نژاد

چه مرز پرگهرءِ هفته نامهءَ زورگ بوتگ

فتیح محمد شهلی بر رییس شورای اسلامی شهر ایرانشهر

پجار:
فتیح محمد شهلی بر چه انقلابءِ اولی نسلءِ مردمان اِنت که وتی عمرۓ اجتماعی جهد کاریءَ گوازینتگ اے وهدءَ واجه ایرانشهرءِ شوراءِ کارمستر اِنت شهلی بر چه سیاستءَ نا امیت نه اِنتءُ مدام هم امیتءَ ورنایانءَ دنت که بوت کنت که سیاسیءُ اجتماعی جهدکار گوں وتی اوپارءُ برداشتءَ هر دورءُ زمانگے په مردمانی کارانی دیمءَ برگءَ یک گونڈیں راهءُ دریءَ گون وتی دیرچاریءُ هژاریءَ پراه ءُ مزن به کنت دانکه مردم په وشی ، ایمنیءُ آسراتیءَ به رس اَنت شهلی بر اے گپءِ منّوک اِنت که گوں نرمیءُ بے هژمءُ زهر گرگ حقیں گپءُ هبر جوانتر دیم برگءُ منینگ بیت چیزے سالءَ که واجهءَ شورا گون وتی همکاراں دز گپتگ بازیں فکریءُ فرهنگی کارے ابید چه شهرءُ شهرداریءِ کاراں دیمءَ برتگ ایرانشهرءِ فرهنگیءُ تاریخی شهرءَ شوراے شهرءُ خاص شهلی برءِ جهدانی برکتءَ اے شهرءِ فرهنگیءُ اجتماعی جهد کاریں ورنایاں گوستگیں ماهءُ سالاں جوانیں ادبیءُ فرهنگی دیوان ءُ مچی برجم داشتگ که بلوچستانءُ استانءِ اے دگه شهراں کمتر گندگ بنت گڑا شهلی برءِ اے گپ منّگ بیت که گوں کمیں امکاناتءَ بازیں جوانیں کارے بوت کنتءُ اگاں اے کار په ملکءُ مردماں کنگ به بنت چه حکومتءُ دولتءِ نیمگءَ هم وشاتک کنگ بنت.
واجه شهلی برءَ اے گندءُ نندءِ تهءَ بلوچستانءَ انقلابءِ اولسرءِ سالانی بازین چستءُ ایرے باروءَ گپ جتگ ءُ امیت اِنت مئے انقلاب اولی نسلءُ جهد کار اے واجهءِ پیمءَ وتی فکرءُ لیکهءَ هنچو انقلابءِ سیئیں سالانی تجربهءُ تاریخءِ نوکیں نسلءَ سر کن اَنت.


واجه شهلی بر شما کدی ءُ کجا ودی بوت اِت وتی وانگ ءُ زانگ کجا آسر کتءُ شما وتی اجتماعی جهد کاری کدیءُ چون بنگیج کت؟
اللهءِ پاکیں نامءَ
من سال 1333 دلگانءَ ودی بوتگاں منی زهگیءِ دور گیشتر بمپورءَ گوست ءُ منی ابتدائی ءُ راهنمایی دورءِ وانگ هم بمپور ءَ بوتگ. قدیمءَ دلگان مروچیگیں دلگان زمینءِ یک ملکءُ هلکے نام اَت. مروچان دراهیں دمگءَ دلگان گوش اَنت هَنو همے دلگانءِ بازار که من ودی بوتگاں غیرآباد اِنتءُ مردم چه اودءَ لڈ اِتگءُ دگه جاهان نشتگ ءُ آباد اَنت من وتی دیپلمءَ رند چه بمپورءَ که من وتی اولی سیکلءِ گرگءَ ایرانشهرءِ شهرءَ گپتءُ آسر کت. منی دیپلمءِ رشته علوم طبیعی اِنت که هنو تجربی گوشگ بیت. سال 1352 که انگت منی سربازی روگءَ چیزے مدت منتگ اَت همے مدتءَ من شش ماهے یک راهسازی شرکتے که بلوچستانءِ راه ۓ په جوڑ کنگءَ گون اتنت کار کت آ وهدءَ دیپلم سک کم اَتءُ ادارهان هر کجا دیپلم لازم اَت همے وهدءَ بافت بلوچءِ کارخانه جوڑ بوت 60/شصتءِ دهکءَ گڑا من بافت بلوچ کارءَ گلائیش بوتاں همے زمانگءَ اسلامی انقلابءِ جنزءَ هم زمانگ اَت . آ وهده وانندهین مردم کم اَت ءُ مردمی جنزان واننده کمتر هور اِتنتءُ چو مروچیگیں وهدءَ ارتباطءُ اطلاع رسانی نیست اَت بلے منءَ گوں بازین دوستے رابطه هست اَت ءُ من سربازیءِ وهدءَ گون وتی دوستان گوں انقلابءِ چستءُ ایراں هور اِتیں اے زمانگءَ شاه حکومتءِ دورءَ بلوچستان باز پد منتگ ءُ زبهرین استانے اَت  سیاسی ، اقتصادی ، ءُ اجتماعی جاور بلوچستانءِ هنچو خرابءُ ناگیگ اِتنت که وانندهین بلوچانی هیال همیش اَت که گوں انقلابء زرمبش هور به بنتءُ وتءَ شریدار به کن اَنت ما زانتگ اَت که اگاں شاهءِ رژیم به روتءُ انقلاب به بیت یک مزنیں بدلی ے دراهین ایرانءَ کیتءُ اے بدلی بلوچستانءَ هم وتی اثرءَ داریت. منءَ په جوانی یات اِنت چیزے روچ پیش چه بهمنءِ پنجاهءُ هپتءَ (57) ما همدءَ ایرانشهرءَ همے فلکهءَ که هنّو ایران پیما گوشگ بیت آ وهداں جمهوری گوشگ بوتینءُ اے زمانگءَ که انقلابی شورءُ هالءُ هواءِ تهءَ نام اِش دادشاه کرتگ اَت ما بازین ورنایے همدا جم بوتین بلے آ وهدی انگت رژیمءُ آئیءِ سرکوبگریں طرفدار بلوچستانءَ زورءُ لٹ اِش گون اَت ءُ کمتر مردمان جرات کت شاهءُ رژیمءِ خلافءَ گپّے بکن اَنت گڑا ما همدا شاهءِ خلافءَ شعار دات ءُ گپ جتءُ اولی برءَ اے شهرءَ ما «مرگ بر شاه» گوشت البت شاهءِ خلافءَ بلوچستانءَ چیرءُ اندرین جهدءُ چستءُ ایر هست اَتءُ بلوچ ورنایاں اے جهداں هورءُ اَوار اِتنت. شهربانیءِ سپاهیگءُ ساواکءِ امنیتی جاور اے وهدءَ سک ترندءُ تیز گون ما دیم په دیم بوت اَنت بلے انقلابءِ شورءُ ولولهءَ آیان اجازت ندات که مارا دلسیاهءُ اذیتءُ آزار بکن اَنت اتقلاب کمیں وهدے سوبین بوت. انقلاب سوب بوت که سرجمین بلوچستانءَ ورنا گون انقلابی جهدءُ چستءُ ایراں گلائیش به بنت انقلابءِ اولی سالانی جاور سوب بوت اَنت که مئے ورنا مختلفیں فکرءِ گروهاں هور به بنت چپءُ راستءُ مذهبی فکر آ روچاں ترند جهدءَ اِتنتءُ بلوچاں وتءَ پیش چه انقلابءَ یک منظمءُ مهریں سیاسی گروهءُ تجربهے نیست اَتءُ انقلابءِ ترندءُ تیزیں روچانءُ نگیگیں جاورانی سوبءَ مئے ورنا یک یک ءُ تا تا بوت اَنتءُ اے دگه سیاسی رمبءُ گروهان هور بوت اَنت بازینے چه ملکءَ درآتک ءُ شُت اَنت ما چه هما فکرءِ مردمان اِتین که منتینءُ مئے فکرءُ هیال همیش اَت که اے مانگءُ کار کنگ اگاں مئے دستءَ کارے به بیت هم په مئے مردمانءُ هم په مئے ملکءَ جوانترءُ گهتر اِنت همے سوب بوت که من اجتماعی چستءُ ایرءُ جهدکاریءَ هور بئینءُ چه روچ مروچی من وتی وسءُ واکءَ گلائیشاں۔
اسلامی فکر مئے ورنائیں انقلابءِ اولی نسلءَ کمتر گندگ بیت اے فکرءِ طرفدار آ وهدءَ بلوچانی تهءَ کم اِتنت یا اسلامی فکرءِ جند ورنایانی تهءَ نیست اَت؟
اسلامی انقلاب هنچو ترندءُ اشتاپ وتی منزلءَ سر بوت که هچ کسءَ چو زوت گتءُ گمانے نیست اَتءُ اے انقلابءِ رهبر هم دینی عالمے اَتءُ انقلاب اے زوتءُ اشتاپیں سوبین بیگ سوب بوت که سیاسی فکرانی تهءَ شنگءُ شانگی بیت آ وهدءَ دو/2 سیاسی جهانی فکر هست اَت یکے سوسیالیست که شوروی بیرکءُ ساهگءِ چیرءَ اِتنت دگرے امپریالیسم که رهشون اِش غربی ملکءُ خاص آمریکا اَتءُ اسلامی فکر که نوکی سر چست کتگ اَتءُ یک انقلابے ایرانءَ آورتگ اَت اے دگه اسلامی ملکاں بلکے کمءُ گیش هست اَت بلے حقیں هبرے اَت که ایران پیش چه انقلابءَ چپءُ راستءِ فکر پر زور اَت ءُ ایرانءَ خاص امام خمینیءُ آئی ءِ دوستءُ همفکران اِتنت که اے فکر اِش رهبری کت گڑا آ وهدءِ چپءُ راستءِ فکرءَ هم راضی نه اِتنت که اسلامی فکر سیمی فکرءُ بلوکے حساب ءَ ماں جهان وتءَ ظاهر به کنت. پمیشءَ آیاں اسلامی فکرءِ خلافءَ گوں یکدگرءَ تپاک اِتنتءُ ایرانءَ ایے وهدءَ دوئین فکر مردم هست اِتنت آیان که چپءِ فکرءِ روادار اِتنت شوروی نیمگءَ رپت انتءُ آیاں که راستءِ فکرءِ منّوک اِتنت غربءِ نیمگءَ دلگوش اِش کتءُ شاهءِ رژیم اِش هم بلکے منّ اِت.
اے زمانگءَ که تو نام گرۓ شاهءِ رژیمءِ خاصیں طرفدارءُ منّوک کۓ اِتنت؟
من ترا گوشت که بلوچستانءَ آ وهدءَ سے سیاسی نگاه هست اَت یک رمبے همایان اِتنت که گوں رژیمءَ هور اِتنت البت بلکے فکری آ ڈولیں همبستگی ءُ سیادی اِش مه بوتیں بلے اداری سیستمءَ هست اِتنتءُ لهتے نپءُ فایدگ اِش هست اَتءُ رژیمءَ اگاں بلوچستان کمءُ قدرے حقءُ امتیازے چو سیاستءُ وکالت داتگ اَت هم همے مردماں نمایندگی کت دگه رمبے هما اِتنت که چپءِ فکرءِ جانبدار اِتنتءُ آیاں چمءُ نگاه جهانی چپءِ فکرءَ سک اِتنت که اے فکرءَ گیشتر دانشگاهءُ وانندئیں ورنایاں منّوگر اِتنتءُ چپءِ فکر مسترین کوکارءُ توار اقتصادءُ عدالت اجتماعی ءِ سرءَ چست کنگ اَتءُ اے هم یک راستین گپے که آ وهدءَ اے فکرءَ گیشتر طرفدار هست اَتءُ سیمی فکر هم اسلامیءُ مئے دینی عالم اِتنت که انقلابءِ طرفدارءُ هورءُ همراه اِتنت بلے مروچی اے سے نگاهءُ سیاسی فکر گوں چپءِ پروش ورگءَ دو فکر جهانءَ حاکم اِنت یکے هما غربءِ سرمایه داری نظام اِنت که رهبندی دموکراسی اِنت ءُ یکے دینی نظام ءُ فکر اِنت که دینی مردم سالاری ءُ دموکراسیءِ فکرءِ رواج دیوک انت یک گپے ادءَ من بے هوش مه کناں که انقلابءِ اولءَ بلوچستان اے دگه استانءُ ملکءُ شهرانی حسابءَ آرامترین استان اَت که په انقلابءَ خاصیں جنجالءُ دلسیاهی جوڑۓ نه کت.
مروچی همے رمب که تو گوشت گوں انقلاب هور بوت اَنتءُ منت اَنتءُ گیشتر اسلامی فکرءِ منّوک اِتنت گون حکومتءَ شریدار اَنت ؟ همے استانءَ منصبءُ دولتی اگده اِش گون اِنت؟
بچار گلزمین ایرانءَ که انقلاب بوت اے ملکءِ هما بستگیں جاور په یک آزات ءُ پچیں چاگردے بدل بوت انقلاب سروکءُ آ انقلابی جاور سوب بوت که جوانین قانون اساسی ے نبیسگ به بیت که اے قانونءِ تهءَ ایرانی قومانی حقءُ حقوق منّگ بوت اَنت بلے حکومتءِ وتی نگاه همیش اَت که ایرانی قوماں جتا جتا مه چار ایتءُ راستی هم همیش اَت. حکومتءَ یک میدانے په دراهیں قوماں جوڑ کت گوں یکدگرءَ رقابت بکن اَنت جهدءُ تکءُ تاچ بکن اَنتءُ هرکس گهترءُ جوانتر کار کت علم ونت کار زانتءُ کار بلد به بیت دیمءَ به روت منی هیالءَ اے تکءُ تاچءُ رقابتءَ اگاں ما پشکپتگیں میار گیشتر مئے وتی اِنت که ما کمتر جهد کتگ اے دگه چه ما پیش کپتگ اَنت.
اے تکءُ تاچ ءِ تهءَ مئے دیمءَ هچ پیمیں مشکلءُ دیوال نه بوتگ؟
منی هیالءَ هما مردم که داور بوتگ اَنت آ چه مئے مٹاں (رقیب) نه بوتگ اَنت اگاں همے مردم که مئے همساهگ اَنت دیمءَ شتگ اَنت آیاں گیشتر جهد کتگ ءُ ترندءُ اشتاپ وتی منزلءُ مقصد رهادگ بوتگ اَنتءُ هر کسی یک میدانے زوتر منزل سر بیت ظاهر اِنت که آئی گیشتر نپءُ سوت بوت کنتءُ اے دگراں رندءَ بلکے کنترل هم به کنت اے منی هیال اِنت چو نه اِنت که من دپءَ دزّاں یا روءُ ریا کناں من گوشاں مئے قومءَ کمے سستیءُ کاهلی کرتگ نو ما باید اِنت سیل بکنیں که مئے عیبءُ نزوری کجا اِنت که ما دگه آ پیشیگیں ردیاں مه کنیں تا که دیمءَ به رویں مئے همساهگءُ استانءِ اے دگه مردماں چه پیشی رژیمءِ وتی تجربه هاں سوب گپت مئے یک دگه دلیلے که مئے زبهریءُ پد مانگءِ سَوب بوت آ اِش اَت که ما آ وهدءَ بهر بهر بوتیں هر کسے یک جاهے شت که همایانی گورءَ شتین که په مئے قومءُ استانءَ هچ برنامهے نداشت اَنتءُ گوں همے بهر بیگءَ گوں یکدگرءَ کستءُ کینگءَ مئے زورءُ توانءَ بے اثر بوت مئے همساهگءُ آ دگه براتاں اے کار نه کت یک جاهءُ مچ بوت اَنت ءُ په وت اِش کار کت ما وتی بی تجربه ای ، سیاسی ، اجتماعی ناپختگیءِ شکار بوتیں تهنا مئے دینی عالماں گهتر عمل کتءُ یکجاه بوت اَنت نو بیاییں چدءُ رند اے ردیاں مه کنینءُ یکدگرءِ میاری‏ءِ جاهءَ کرتنءَ بیائیں هورءُ همراه په وتی مردماں کار به کنیں۔
شما گوشت که چه انقلابءِ اول داں هنّو که سی سال چه انقلابءِ عمر گوستگ ادءِ بلوچءُ غیر بلوچءَ برابریں موه (فرصت) دیگ بوتگ که دیمءَ به رو اَنت بوان اَنت ، منصبءُ پستءُ اگده به گر اَنت ءُ ... بلے یک راستی ے (واقعیت) هست که پیش دار ایت که مئے دانشگاهیءُ وانندهیں مردمانی شمار همے دانشگاهءَ بلوچستانءَ اول انقلابءَ گیشتر بوتگ اَنت مروچی پرچا ما هما جاگه منتگیں ءُ اے دگه غیر بلوچاں دانشگاهءِ دراهیں منصب ءُ اگده گون اَنتءُ وانندهانی حسابءَ هم ما چه آیاں باز پشت کپتگیں ادءَ سوب چی اِنت؟
من اے گپءَ نه منیں که مئے وانندهانی حسابءُ شمار گیشتر بوتگ پرچا که من یک آمارے دارین که مئے آ براتاں هما وهدءَ بازین مردمے داشتگ اَنت که ڈن چه ملکءَ وانگ اِتنتءُ همشاں هنو هم همدا هست اَنت مئے واننده گیشتر اے وهدءَ هما اِتنت که سیاسیءُ اجتماعی کاراں گلائیش اِتنت ءُ رند چه انقلابءِ چستءُ ایراں بازینے دران ڈیهـ  بوت اَنت منی هیالءَ مئے مشکل تهنا علمءُ وانگءُ زانگ نه اَت مئے مستریں مشکل اقتصادی اَت انقلابءَ رند که ما باید به رپتیں به ونتیں گوں مرزانی پچ بیگءُ تجارتءُ سوداگریءَ مئے بازینے چه دوستاں که باز روشنءُ تیز هوشیں مردم اِتنت وانگ اِش ویل کتءُ تجارتءُ کارءُ بارءِ نیمگءَ شت اَنت همے سربازءُ راسکءَ بازینے وتی دانشگاهءُ کارمندی هم ویل کتءُ تجارتءُ اقتصاداِش زرت اے اقتصادی نزوری که مارا پیش چه انقلابءَ هست اَت سَوَب بوت که مئے ڈڈیں ءُ لائقیقں مردم که اقتصادی سنچ اِش هست اَت اقتصاد ءُ زر ءُ مالءَ وتی نیمگءَ کش اِتنت اے همایان اَنت که من زاناں چونیں جوانیں استعداد اِش په وانگءَ بوتگ مئے وتی هم کلاس دوست هم بوتگ اَنت
مئے چاگردءِ پیشی نسلءُ هنوگیں نسلانی تهءَ یک مزنیں فاصلهے کپتگ مروچیگیں نسل چه پیشی نسلانی تجربهءَ بے بهر اِنت پیشی نسل وتی تجربهءَ اے نسلءَ سر کت نه کنت یا چه یکدگرءَ بیزارءُ شزار اَنتءُ یا که ترس اَنت که سیادیءُ هوری اِش نقصءُ تاوانے بیار ایت تئے هیالءَ سوب چی اِنت که اے نسل انگت هورءُ همراه نه بنتءُ وتی ردیءُ نزوریانی سرءَ گپءُ ترانے بنگیج نه کن اَنت؟
اے جستءِ جواب شما تا مزنیں کساسے دات یکے وَ ایش اَت که من دیمترءَ گوشت که مئے آ فکری وانندهیں مردم اقتصادءُ زرءِ ءُ مالءِ نیمگءَ شت اَنتءُ نه یهت اَنت وتی عیبءُ نزوری اِش در نه گپت اَنتءُ اجتماعی ، فرهنگی کار اِش نه کت یک دگه ٹکے که چه مئے نسلءَ رند واننده بوت اَنت آیاں اے غلط فهمی ءُ دگر ءِ مان نیارگءِ شکار بوت اَنت که ما وت زانوگرءُ زانتکاریں مارا دگرانی تجربه در کار نه اِنتءُ اے چیز اِش پر وت عیب زانت که چه پیشی نسلاں چیزے یات به گر اَنت اے نسلءَ باید اِنت پیشی نسلءِ شریءُ خرابی جوانیءُ نزوری جست به کتین انت مئے نسلءِ دوستاں انقلابءِ اولءَ مدام چه وت جست کت که ما چون به کنین ؟ مئی جند اے فکرءِ طرفدار اِتاں که ما باید برویں جهاد سازندگیءِ تهءَ یا نهضت سوادآموزی ءَ وتی مردماں وانندهءُ وتی حقءُ حقوق گوں پجاروک به کن ایں اگاں ما اے کارءَ به کنیں مردم وت وتی حقانی زِنگءَ جوانتر عمل کن اَنت مردم که زانتکارءُ واننده بنت آیاں گڑا همے ملکءِ ءُ نظام که دراهیں منبع همایانی گورءَ اَنتءُ مئے گورءَ هچ نیست. رو اَنتءُ وتی حقاں پد جن اَنت وتی آپ راه ، اقتصاد ، وانگءُ زانگ ، سیاست ءُ ... په گپگ ءُ گور کن اَنتءُ چو مئے اے دگه استانانی وڑءَ چه نظامءُ انقلابءَ که ما درست آئیءِ واهندیں استفاده کن اَنتءُ یک دگه گپے که من لوٹاں به گوشاں آ ایش اِنت که ما گون نظام وتی رابطهءُ سیادی مدام به دارینءُ اے بابتءَ هچ شکءُ شهبهے مه کنینءُ وتی حقءُ حقوق چه آیاں به لوٹ ایں آ هم الّمءَ بلوچ قومءَ اے ملکءِ صاحبءُ باشنده زان اَنت ءُ هر ڈولیں خدمتے که دگه جاهاں کن اَنت ادءَ پر ما هم چکءُ پد نه بنتءُ بژنیءُ اپسوزی گپّے که مئے ورنایاں انقلابءَ اولءَ اے گپ اِش باور نه کت اَنتءُ هم وت اِش ضرر کتءُ هم مئے قومءَ بازین تاوانے رست تو منی هیالءَ مئے گڈی ءُ رندی نسل اے باورءَ رستگ اَنت بلے شرط همیش اِنت که وتی پیشی نسلانی جوانیءُ نزوریاں بزان اَنت ءُ گوں مروچیگیں علمءُ زانگءَ دیم برو اَنت یک دگه چیزے که بے هوش مه کناں ایش اِنت که مئے واننده زانتکاریں کماشءُ قدیمی نسلءِ تجربهءُ زانتکاری ماراهم لازم انت من ءَ وتءَ یاد اِنت که من گونڈ بوتگاں من مدام بلوچی کماشانی دیوانءُ درگاهاں نشتگءُ آیانی گپءُ هبر گوش داشتگ اَنت تا که چیزے شه آواں یات به گرین مئے همے بے علمءُ سوادیں کماشءُ سرداراں سالانی سال اے قومءِ رهشونیءُ زندءِ اے دگه پڑءُ مسائلانی تجربه ءُ زانتکاری هور اِنت اشانءَ مئے قوم تاریخ هور اِنت مئے وانندهءُ زانتکار باید اِنت گوں چاگردءِ هر ٹکءُ رمبءِ مردماں نندءُ پادا بکن اَنت دانکه چاگردءِ جیڑهءُ جنجالاں سرپد به بنت.
رند چه انقلاب تهنا وکالتءِ راه ءُ در په مئے استانءِ مردماں پشت کپتگ که سیاست بکن اَنت اگاں نه دگه سیاسے حزبءُ گروهے مارا نه بوتگءُ نے که مرکزءِ اسلامی حزبءُ گروهاں خاصیں نمایندگی ے ادءَ بوتگ که مئے مردم سیاستءَ آ ڈول که باید اِنت هیل به گر اَنتءُ بکن اَنت تئے هیالءَ نمایندگیءِ اے هشتیں دوره هاں پر ماءُ مئے لوٹ ءُ واهگاں چه حکومتءَ جوانیں درءُ وسیلهے بوتگ؟
چه یک نمایندهے که یک نپرءُ فردے بازین توقعءُ انتظار دارگ جوانین گپے نه اِنت ءُ پدءَ ما بچارین رند چه انقلابءَ مئے ملکءَ بازین جیڑهءُ جنجالے گون دچار بیت جنگ اَت ، اقتصادی مشکل اِتنت هر ملکءَ رند چه انقلابءِ نگیگیءُ مشکلاں انقلاب که تثبیت بیت گڑا آ ملک وتی برنامهءُ مقصدءُ مرادان رست کنت منی هیالءَ مئے سے دورءِ مجلس همے چستءُ ایرانءُ مشکلءُ دلسیاهیاں گوست شه چارمی دورءَ مردم یک حسابے چه اے تریبونءَ په وتی مشکلءُ دلسیاهیانی ٹهینگءَ گهتر استفاده کتءُ چه وکیلانءُ خاصیں امیتءُ انتظار اِش داشت.
سئیں دورهءِ مجلس که تو گوش ۓ اے دگه استانءُ شهرستاناں نماینده هاں پر وتی مردماں کار کرتگ بلے ادا ما خاصیں کار نامهے نه گندیں؟
منی هیالءَ انقلاب اولی سالانی جاورءَ مئے آ سئیں دورءِ نمایندهاں اے اجازه نداتگ که مرمانی لوٹءُ واهگان به گوش اَنت البت هما وهدءَ مردمانی لوٹ ءُ واهگ ، دانشگاه ، راه ، آبادانیءُ دیمروی بوتگءُ اے لوٹ هم هچ جمهوری اسلامی قانونءِ چارچوبءِ تهءَ هست اَنت بلوچستان هم همے ملکءِ بهرے ءُ هما حقءُ حقوق که آ دگراں دیگ بیت مارا هم دیگ بنت ما وتی لوٹءُ واهگان تهنا چه مجلسءِ نمایندهان مه لوٹین باید اِنت شه دراهین درءُ وسیله هاں که اے ملکءَ هست اَنت وتی توارءَ نظامءُ حکومتءَ سر به کنینءُ الّمءَ مئے توار اشکنگ بیت.
ما مجلسءِ گپءَ کنین تئے هیال مجلس وتی اگده په جوانی مار اِتگءُ عمل کرتگ؟
نه ! من نه گوشاں که جوان اِش عمل کرتگ یا مچین وکیلان اے کارءِ لائق بوتگ اَنت اگاں بوتین اَنت مئے استان حال اے نه اَت. البت اے گپءَ هم بے هوش مه کنین که مئے انقلابءِ عمرءِ نیم گوں مشکلءُ جنجالاں گوستگءُ نوکی چیزے سال اِنت که ملکءِ سرجمیں تهکءُ توان په آبادانیءُ دیمروی کار گرگ بنت.
رند چه آ سئیں دوره هاں مئے مجلسءِ وکیلاں دیم په گهبودی بوتگ اَنت بزاں هر دوره چه آ دگه دوره گهترءُ جوانتر بوتگ اَنت؟
مردمانی گچینءِ دایره پراهءُ مستر بوتگءُ هر کس قانونءِ مطابقءَ کاندید بوت کنت وتءَ کاندید کنت البت بلکے په مجلسءِ وکالتءَ هر کسءَ تایید مه کن اَنتءُ اے قانون هم غربی ملکانی تهءَ هستءُ یک کنترلے کن اَنت. مثلا شما بچار اِت غربی ملکاں سوسیالیستی حزباں کمے کنترل کن اَنتءُ نیل اَنت که آ په وشیءُ راحتی قدرتءِ تهءَ بیا اَنتءُ وکیلانی جوانیءُ نزوری داں یک مزنیں حدے برگرد اِت مئے مردمانی سرءَ که نمایندهءَ گچین کن اَنت مئے شهرستانءُ استانءَ هم دینی عالمانءَ مزنین کردے هستءُ اگاں لهتے وکیل اے سالانی تهءَ نزورءُ ناتوان بوتگ اَنت بلکے ما مردم که آیاں ما گچین کرتگ اَنت جوانین مشاور په آیاں نه بوتگینءُ چه آیاں حسابءُ کتابءُ جوابگوئی نه لوٹ اِتگ هما قولءُ وعده که مار اِش داتگ اَنت رند چه آیانی دورهءِ آسر بوگءَ جستءُ پرس اِن نه کرتگ اَنت منی هیالءَ یک وکیلیءَ یک جوانینءُ سرپدیں تیمے په مشورت دیگءَ لوٹ ایت ءُ یک دگه نزوریءَ که مارا وتءَ هست ایش اِنت که مئے لوٹءُ انتظار چه یک نمایندهے سک باز اَنت نمایندهءِ مسترین اگده همیش اِنت که جوانیں قانون نبیسگءَ مجلسءَ کمک به کنتءُ دگرے ایش اِنت که قانون ءِ اجرا کنگءَ چارءُ بیچارءُ نظارت به کنت ما اے چیزاںهچ شه آیاں نه لوٹین من اے گپءَ منّاں که مجلسءِ یکے چه اهمتریں جاگاهان اِنت بلے اگاں وکیل ءُ مردم آئی اهمیتءُ بستارءَ بزان اَنت .
تو گوشت کن ۓ که اے هشتیں دوره هانی توکءَ کجام دورهءِ وکیل یک کمے مردمانی لوٹءُ واهگان گون نزیکتر بوتگ یا ایشی که مردماں شه آ دورءِ وکیل کمءُ باز راضی اَنت؟
منی نزّءَ هشتیں دورءِ سرجمیں وکیلاں وتی جهد کرتگ بلے چارمی دورءِ وکیل یک کمے گهتر بوتگءُ بلے هر وکیلءِ زمانگءُ ملکءِ جاورءُ هال هم سیل کنگ به بنتءُ چارمی دورهءَ ملک چه جنگءُ اے دگه جنجالءُ مصیبتاں کمے آسودگ بوتءُ تثبیتءِ حالتءَ رس اِتگ اَت پمیشءَ چارمی دورءِ وکالت گوش ۓ کمے په مئے شهرستانءَ گهترءُ جوانتر بوتگ.
اگاں چوش اِنت گڑا پرچا چار دورهءَ رند چه آ دورهءَ که ملکءِ اقتصادی ، سیاسی ، عمرانی جاور گهتر بوتگ اَنت مئے اے دگه وکیل چار قدم دیمءَ تر نه شتگ اَنت؟
یکے ایش اِنت که مئے استانءُ دمگ یک تاریخی پد منتگیءُ زبهریءِ چه قدیمءَ شکار اِنتءُ باز کار لوٹ ایتءُ اے مشکل شه جڑءُ ریشگءَ ودی کنگ به بنتءُ په اے کارءَ مارا یک زانتکارءُ شیواریں وکیلے پکار اِنت که اے دگه ٹکءُ چاگردءِ مردمانی شورءُ مشورت ےءِ هور به بیت یک وکیلے تهنا هچ کارے کت نه کنت تا که مردم وت مه لوٹ انتءُ چه وکیلءَ کار به گر انت.
شمۓ نظرءَ یک جوانین وکیلے نشان چے اَنت یا یک ایده آلین وکیلے چے کنگ لوٹ ایت؟
من مردمانی لوٹاں دو بهر زاناں یکے اقتصادی اَنت که گیشترین مردم اے لوٹ ءَ دار اَنت ءُ دگه فرهنگی لوٹ اَنت یکے چه مئے فرهنگی لوٹاں مئے زبانءُ فرهنگ اِنت که اے چیز وت مئے نظامءَ منّ اِتگ ءُ قانون اساسیءِ تهءَ یهتگءُ اے چه مئے ملک افتخارات ءَ حساب بیت که مئے دراهین قوم گوں مختلفیں زبانءُ وتی دودءُ ربیدگاں اے سرزمین زندگی کن اَنتءُ اے لوٹءُ واهگانی پوره کرتنءَ باید اِنت نماینده جهد به کنتءُ هما جاورءَ ودی به کنت دانکه استان دراهین پڑاں سیاسی ، اقتصادی ، فرهنگی دیمءَ به روتءُ اگاں اقتصادی ، اجتماعی ءُ فرهنگی جهد مه بیت هچ ملکءُ دمگے دیمءَ شت نه کنت اے مئے فرهنگی حق اِنت که مئے زبان دانشگاهی کرسی به بیت پرچا که قومانی هویتءُ پجار پهریزگ ءُ دارگ مۓ راجی ءُ ملی هویتءِ سرجم کنوک اِنتءُ اگاں مئے ملکءِ قومی پجار گار به بنت المءَ مئے ملیءُ راجی هویت نزور ءُ لاغر بیت ادءَ نماینده اگده اِنت که اے قانون اساسیءِ جوانین اصل مئے منصبدارءُ دولتیاں په جوانی سر پد به کنتءُ اے اصلءَ عملی دروشمے بداتءُ نظامءَ اے گنجایش ءُ ظرفیت هست که مئے دراهین قانونی لوٹاں پیلو به کنت بلے شرطءُ بئے همیش اِنت که اے حق په جوانی ءُ شیواری لوٹگ به بنت منی هیالءَ اے گپ سک مهم اِنت که ما وتی لوٹ‏ءُ واهگاں چون آیاں سر به کنینءُ مارا دائم وتی لوٹانی سر کنگءَ مشکل بوتگ.
پرچا مئے مردم وتی لوٹانی سر کنگءَ مشکل دار اَنت ، نماینده مردمانی لوٹءُ واهگاں نه زان اَنت یا قول بلوچی ءَ دپءَ دز اَنت؟
من گوشاں نه ترس اَنتءُ دپ دزاَنتءُ نے که نه زان اَنت بلے مئے قومءِ مشکلءُ جنجال هنچو باز اَنتءُ سر په چک اَنت که نماینده چار ایت که مردمانی گیشترین لوٹ چی اَنت گڑا لهتی پیشءُ لهتے پدءَ تر هِلّ انتءُ نماینده گمان کن اَنت که مردمانی گیشترین لوٹ بلکے مئے اصلی ترین مشکل اَنت بلے لهتے لوٹ هست اگاں یک ٹکّے آیاں لوٹ ایت بلے اگاں په جوانی سیل بکن ۓ آ سرجمیں قومءِ حقءُ حقوق اَنت که سرگوز کنگ نه بنتءُ دانکه آ حق مارا مه رس اَنت ما دیمءَ شت نه کنین.
هر ٹکّءُ گروهیءَ یک لوٹے هست لهتے لوٹ هست اَنت راست ۓ اگاں آ وانندهیں مردمانی لوٹ اَنت بلے بندرءَ آ سرجمیں قومءِ بندری حق اَنت چو فرهنگی لوٹءُ واهگ که لوٹوک اِش بلکے یک ٹکّے به بیت؟
من شمۓ اے گپّءَ منّین مۓ دوستانءَ اے نزوری هست که چار اَنت چنکس مردمے یک چیزے لوٹ ایت اے جوانیں گپّے نه اِنت نماینده باید بچار ایت که اے حق که مردم ۓ لوٹ اَنت آیانی جوانءُ برحقین لوٹے ءُ آئیءِ رندگیریءُ پد جنگءَ کوتاهیءُ سستی مه کنت شه روچ مروچی من چشین نمایندهے نه گندین که مئی فرهنگی لوٹاں پد به جنت اے ٹوهین نزوری ے که مئے نمایندهاں هست.
ایرانشهرءِ وکالتءِ کرسیءِ سرءَ مدام شیعه ءُ سنیءِ بحث ءُ باوست هست ءُ کمتر نمایندهءِ لائقیءُ قابلیت چارگ بیت اے جیڑه کدی کٹّ ایت ءُ ایشیءِ نقصءُ تاوان چی اَنت؟
نمایندگیءِ یک حقوقی بستارءُ ارزشی دار ایتءُ مذهبی بستارے نه دار ایت نمایندهءِ لوٹءُ مردمانی لوٹ هم حقوقی اَنت ءُ مذهبی نه اَنت ءُ شما بچار اِت اگاں مردمءَ هنچین کسانیں جیڑهءُ مشکلے گون دگه شخصی به بیت اگاں وکیلے گرایت گڑا نه چار ایت اے وکیل چه زاتءُ زریاتءُ مذهبے دار ایت آ سیل کنت که اے وکیلءَ وکالتءِ علمءُ زانتکاری به بیت دانکه آئیءِ وکالتءَ به کنتءُ آئی حقءَ پد به جنتءُ په وتی موکلءَ سربه کنت گڑا مجلس وکالتءِ کرسی هم باید اِنت هنچو به بیت مردم اے گپّءَ بچار اَنت ءُ سیل بکن اَنت اے مردم که لوٹ ایت آیانی وکالتءَ به کنت چنکس اے کارءِ لائق اِنت اے مردم اگاں سنی ے بیت یا شیعهے باید اِنت په اے کارءَ قابلیت ءُ صلاحیت داشته به بیت نماینده نه روت که یک مذهبیءَ دیم به بارتءُ دگریءَ جهل به جنت مئے نمایندهءِ بستارءُ ارزش همے چیزان ءُ مپتیں جیڑواں  جهل یارتگ اگاں نه مجلس ءَ جاگه مئے ملکءَ یک برزءُ بلندیں جاگهے ءُ اے جاگهءَ باید اِنت یک مردمے به روت که هما قدءُ بالادءَ بدارایت که اے جاگهءِ لائق به بیتءُ اے کرسیءَ هما نماینده ارزش دار کنت که اے جاگهءِ قدرءَ ءُ قیمتءَ بزانت . ما رای دیوک هم اے سلیں فکرءِ شکار مه بئیں که نماینده المءَ یک سنی ے به بیت یا که شیعهے نماینده باید اِنت اے کارءِ لائق به بیت مردمانی حقءُ حقوقءِ پد جنوک به بیت.
همے مذهبی اختلاف ءُ نمایندگیءِ کرسیءِ کمیں مذهبی رنگ دیوک گیشتر کجا ٹکءُ گروه اِنت؟
یک خاصیں گروهے نام گرگ نه بیت بلے هست اَنت دانشگاهیانی توک چه شیعهءُ چه سنی هست که اے فکرءَ دار اَنت ءُ دینی عالمانی تهءَ هم لهتے هست ماں همے رمبءَ هور اَنت منی هیالءَ مئے سنیءُ شیعه دینی عالم گون همدگرءَ به نند اَنتءُ اے گپءَ هوری ءَ به منّ اَنت که مجلسءِ بنگپ مذهبی بنگپے نه اِنت ءُ وکیلے مجلسءَ بروت که وکالتءَ په جوانی کرت به کنتءُ مردم هم ایشیءِ مذهبءِ سرءَ رای مه دینت بلکے آئیءِ فکر ، قابلیت ءُ صلاحیت سیل کنگ به بیت.
ایرانشهرءِ کارءُ روزگارءِ مسترین وسیله چه گوستگین رژیمءُ رند شه انقلاب بافت بلوچ کارخانه بوتگ اے کارءُ روزگارءِ یکءُ تهنائیں کارخانه آسرءُ عاقبت مروچے کجا رستگ؟
بچار آرژیمءَ یک مدتے اقتصادی استراتژی همے بوتگ که بلوچستانءَ وانگءُ زانگ سک کم بوتگ مردم ءِ اقتصادی جاور سک نزور بوتگ گڑا دولتءَ همے شور کتگ که من ادا یک کارخانهے جوڑ کناں دانکه اے مردمانی زهگ بوان اَنت دیمروی به کن اَنتءُ دیمی نسل واننده تر به بیت بلکے آ زمانگءَ اے کارخانهءِ جوڑ کنگءِ مراد کارءُ روزگار هم بوتگ بلے اقتصادءِ علمءَ یک اصلے هست که گوش ایت تولیدءِ اقتصادءِ تهءَ کارءُ روزگار جوڑ کنگ اصلی مراد نه اِنت بلکے مقصدءُ مراد سوتءُ نپ دیگ اِنت مروچی چه سوسیالستی اقتصاد به بیت یا سرمایه داریءِ مچ همے نیمگءَ شتگ اَنت که هر صنعتے داں سوت ءُ نپ مه بیت آ کارءُ روزگار جوڑ کت نه کنت آ زمانگءَ اے کارخانهءِ جوڑ کنگ نگاه همے بوتگ چیزے مردم همدا کار ءُ روزگار به کن اَنت بلے اے کارخانهءَ هما وهدءَ منی هیال ءَ تاوان داتگءُ دولت مدام بازین زرے ایشیءِ سرءَ هرج کرتگ دانکه بند مه بیت رند چه انقلابءَ که ملکءِ مالی جاور بد بوت اَنتءُ آ اقتصادی استراتژی بدل بوت گڑا اے کارخانهءَ دولت چدءُ گیشتر وتی پادانی سرءَ داشت نه کنت اے کارءَ سرجمیں جهانءَ کن اَنت که هر دمگیءَ آ دمگءِ اقتصادی ، فرهنگی جاورانی حسابءَ لهتے  هنچین عمرانءُ آبادانی کار کن اَنت یا کارخانهے جوڑ کن اَنت یا که کشاورزی مجتمع که پیشی رژیمءَ جوڑ کت اَنتءُ کارخانه بافت بلوچءِ کشءَ سهامی زراعی شرکت جوڑ بوت اَنت مقصد ایش اَت که کسانین مالکانی زمین یکجاه کنگءُ کشار به بنت آ وهدی نگاه همیش اَت که اے مردماں وتی زمینان وت ادارهءُ مدیریت کرت نه کن اَنتءُ هم مالیءُ فکری نزوری دار اَنت یکے دگه چه بافتء بلوچءِ کارخانهءِ جوڑ کرتن ءِ دلیلان همے بوتگ که مئے دمگءِ مردمان اقتصادی ءُ مالی جاور اِش زبر به بیت تا که وتی چکءُ زهگانءُ دیمی نسل وانینت کرت به کن اَنت ءُ وتی پادانی سرءَ به اوشت اَنت مروچی تهران ءُ اے دگه استانانی تهءَ بازین گد گواپی کارخانهے بند بوتگ اَنت که همے مشکلءَ دیم په دیم بوتگ اَنت.
اے کارخانهءِ جوڑ کنگءِ بارین پیشی دولتاں یک فکرے کرتگ که ادءِ مردمانی دست په کارءُ روزگارءَ اودءَ بند به بیت ، اے که بند به بیت بازینے بیکار نه بنت؟
بلکے دولتءُ حکومت هما نگاهءَ بدار اَنتءُ هنچین کارے به کن اَنت بلے هنو اقتصادی جاور شه پیش چه انقلاب ٹگل اِتگ اَنتءُ بدل بوتگ اَنت مارا وتءَ هنچین مردم هست که ده چشیں کارخانه که بافت بلوچءَ جوڑ کت کن اَنت باز مردم هست که من نام نه گران بلے انگت هما فکری جاور مئے دمگءَ ردوم نه گپتگ که زردارءُ مالدارین مردم وت چوشین کار بکن اَنتءُ دولتءُ حکومتءَ درستین کاران چم اِش سکّ مه بنت.
شورانی سیمی دور اِنت تئے هیالءَ شوراءِ سوتءُ نپ یا نقص ءُ تاوان چے بوتگ اَنت؟
شوراءِ دو مزنین نزوری هست که هر دو هم مردمانی نگاهءَ برگرد ایت یکے ایش اِنت که مردم انگت نه زان اَنت که شورا چی ے ءُ شوراءِ اگده (مسئولیت) چی اِنت ءُ اے تهنا مئے شهرءُ دمگءَ نه اِنت سرجمیں  ایرانءَ مردمان اے نگاه هستءُ ادا البت گیشتر اِنت مردم فکر کن اَنت شوراءِ کارءُ اگده تهنا شهردارءِ گچین کرتن اِنتءُ شهردار هم شهرءَ خدمات دنتءُ اداره کنت اے مئے مردمءُ چاگردءِ نگاه اِنت همے نزوری مردماں وکیل مجلس نمایندهءِ باروءَ هست ءُ اودءَ دگه رنگے وت پیش دار ایت بلے هر دوئیں اے نگاه یکجاهے یکدگرءَ هور بنت بزاں مردمانی نا آگاهی نمایندهءُ شوراءِ بابتءَ که هر دواں مردم گچین کن اَنت. 
 مئے مردماں اے باروءَ کے آگاه به کنت؟ مئے شوراءُ وکیل باید اِنت مردمانی تبءَ بدل به کن اَنت؟
تئے اے گپ راست اِنت که مردماں باید اِنت شوراءِ وتی جند اے باروءَ سرپد به کن اَنتءُ یکے چه شوراءِ اگدهاں همیش اِنت بلے اپسوزی گپ ایش اِنت که مئے شورایان وت هم وتی اگدهءُ وظیفهءَ زبر نه زان اَنت مئے بازین شوراے انگت نه زان اَنت که ما کئیں مئے اگده چی اِنت پرچا گچین بوتگین ءُ مئے گیشترین شوراءِ باسکاں هما مردمءِ نگاه هست که تهنا شهردارءَ گچین به کن اَنت یک مزنین شورایانی ایرازے همیش اِنت که انگت یک خاصینءُ سرجمین قانونے شوراءِ باروءَ مجلسءَ جوڑ نه کرتگءُ اگاں چیزے قانون شوراءُ شهرداریانی باروءَ هست هر کسے کیت وتی میل ءُ تبءَ قانونءَ تفسیر کنت من اے گپءَ په دلجمی گوشان که مئے 90% شوراءِ باسکاں همے کمءُ قدرین قانونءَ نه زان اَنت ءُ ما اگاں میاریءِ رندءَ به گردین کۓ اِنت المءَ هم شوراءُ هم مردم میاری اَنت مئے قانون اساسیءِ تهءَ شوراءَ یک اهمیں جاگهے هست بلے اے مردمءُ شورایانی جند اَنت که اے جاگه ءِ قدرءُ قیمتءُ ارزشءَ به زان اَنت.
 گوں دولتءِ نوکیں لایحهءَ که مجلسءَ شتگ شوراءِ اختیارانی کم کنگءَ گڑا بارین اگاں شوراءِ هنوگیں اختیار کم کنگ به بنت په شورایان چے پشت کپ ایت؟
دولتءَ شورایانی اختیارانی کمءُ گیش کنگءَ بازین کردے (نقش) نیست اے مجلس اِنت که اے کارءَ کت کنت مجلس که یک گچین کرتگیں نهادے باید اِنت دولتءِ کارءِ دیمءَ بدار اِیت اے دولتءِ لایحهءَ شهرداری باروءَ گوشگ بوتگ هما شهر که جمعیت اِش چه 200 هزارءَ برز تر اِنت باید اِنت شهردار اِش چه استانداریءِ نیمگءَ گچین کنگ به بنت  اگاں استاندارءَ سے ءُ چار گچین کتءُ شوراءَ رد کت اَنت گڑا چے بیت اے دگه جنجالے ءُ مشکلے بیت که شوراءُ شهردارانی سرءَ کیت من اے گپءَ تپاک نهانءُ ادا مجلس هچ رنگءَ پشتءَ مه کنزایت بلکے دولتءِ همفکرین لهتے نماینده اے چیزءَ لوٹ ایتءُ دولتءُ مجلسءِ همفکری جوانین چیزے بلے مردمانی گچین کرتگیں شوراءِ اختیاراں کم کنگءَ اگاں مجلس اے کار به کنت آیانی طرفدارین مردم سک دلپروش بنت شما بچار اِت پیش چه شورایاں شهرداراں وزارت کشور مهماندار بوتگ اَنت ءُ فرهنگی ، عمرانیءُ اجتماعی مسائلانی دیمءَ برگ تهنا شورایاں کرتگءُ چه شهردارءَ لوٹ اَنت اے کاراں به کنت.
تئے هیالءَ بلوچستانءَ شورایانی خاصین نزوری چی اَنت؟
منی هیالءَ مئے شورایانی نزوری گیشتر برگرد ایت به مردمانی گچین کرتنءَ مئے مردم گچینکاریءِ وهدءَ گیشتر سیادیءُ وارثیءُ هم ملکیءُ اے چیزاں سیل کن اَنت گڑا هما مردم که قابلیت اِش په شوراءِ کارءَ هست گچین نه بنت البت ایرانشهرءَ اے چیز کم کم گار بیگ اَنت بلے اے دگه مئے شهراں انگت هست اے چیز سوب بیت که نزوریں مردم شوراءِ تهءَ بیا اَنت.
 شورا بلوچستانءَ هنچو که شما گوشت سیادءُ وارثی سوب بیت که لهتے آ جوانیءُ شری که په شوراءِ یک باسکے الّمی اِنت سیل مکن اَنتءُ همے سَوَب بیت که شهردارءِ گچینءَ مشکل ودی به بیت تو بچار بلوچستانءِ گیشترین شهرداراں شورایانی سیادءُ وارث اَنت گڑا په شهردارءِ نظارت کنگءَ شوراءِ نظارتءِ تیغ کنٹ نه بیت؟
گچین کرتنءِ وهدءَ که سیادیءُ وارثی ءُ قومءُ قبیله شوراءِ گچینءَ دخیل به بیت آ الّمءَ شهردارءَ گچین کرتنءَ شورایاں ناچار کن اَنت که آیانی لوٹءُ واهگءَ پوره به کن اَنتءُ شوراءِ باسک هرچے جوانین مردم به بنت سیادءُ وارثیءِ هبر که بیت بلکے شورائیاں شهردارءَ وتی سیاد ءُ وارثے به کن اَنت بلے گڑا ادءَ باید اِنت نظارتءِ تیغ ءَ انگت تیزتر به کن اَنت من وتءَ گوشاں من شوراءِ کارمستر بوتاں گڑا اوّلی کارے که من کت آ ایش اَت که من نظارتءِ کمیسیون جوڑ کت که اے دگه شورایاں انگت اے کار نه کرتگ ءُ من اے کمیسیون ءِ باسک هما واجه کرتگ اَنت که بلکے شهردارءِ گچینءَ مخالف هم بوتگ اَنت اگاں شورا شه وتی شهردارءَ داں اے حدءَ ایکیم انت که راستیں مدیرے گڑا چه هچ پیمیں نظارتے نه ترس ایت مئے نظارتءِ کمیسیون چه شوراءِ مچین کمیسیوناں پرزور تر اِنت ءُ شهردار هر لایحهءُ قراردادے کیت المءَ اودءَ سیل کنگ بیت که هچ پیمیں مشکلے نه دارایت یا قراردادے که گوں مردمے یا شرکتے بندگ بیت ایشیءَ سیل کن اَنت که چیرءُ زیری ے مه بیت ءُ اے قراردادءِ تهءَ شهرداری تاوان مه گند ایتءُ هر مدیرے اگاں بزانت که په جوانی نظارت بیت المءَ ردی کمتر کنت.
 باریں شهرداریاں پیش چه شوراءَ اداری فساد گیشتر بوتگ یا هنو که شورایاں شهردارءَ گچین کن اَنت؟
گوشگ نه بیت که هچ فسادءُ نزوری نیست اے نه بوتگیں گپّے شهرداری پیش شه شوراءُ رند شه شوراءَ یک حساسین جاگهے بوتگ پرچا که شهردارءِ دست په بودجهءِ بندگءُ خرج کنگ پاچ انت ءُ همے پیم شهردار وتی هما درآمد که چه شهرءَ شهرداری ءَ رس اَنت وتی صلاحءُ نظر هرجا که لوٹ ایت خرج اِش کرت کنت پمیشءَ بوت کنت که شهردار اگاں نظارت مه بیت خطاءُ ردی ے به کنت البت من اے گپءَ نه منین که رند چه شورایانی جوڑ بیگءَ فساد گیشتر بوتگ شورا مردمانی امینءُ امانتدار اِنت آیاں وتی اخلاقی ، وجدانی ذمه وار زان اَنت که مردمانی امانتءَ خیانت مه کن اَنت ءُ الحمدلله مچ مسلمانیں مردم اَنت که سوگند اِش هم وارتگ که امانتدار به بنت اے دوئیں چیز سوب بنت که شهرداریءَ رند چه شورایانی جوڑ بوگءَ فساد کمتر به بیتءُ پدءَ شوراءِ باسک همے چاگردءَ زندگی کن اَنت آیانءَ پر وت شات نه بیت که وتی مردمانی تهءَ نامءُ دپ به بنت من نه گوشاں که فساد صفر بیت پرچا که شوراءَ په نظارت ءَ نه مالیءُ نه انسانی وسءُ واکءَ نه دار ایتءُ اے چیزءَ هم بزان اِت که هر کمسیونے شهرداریءَ هست اودءَ شوراءِ یک باسکے هور اِنت ءُ شورا وتءَ مردمانی شوراء زانت نے شهرداریءِ شورا په مردمانی حقءُ حقوقءِ پهریزگءَ یک تشے کوتاهی نه کنت.
 ایرانشهرءِ شهرءِ درآمد په شهرءِ ادارهءَ کرتنءَ کافی اِنت؟
مئے ملکءَ شهراں لهتے سیدءُ سر آگاه اَنتءُ لهتے غریبیں شهر گوشگ بنت ءُ شهرءِ 80% درآمدءَ مردمانی اقتصادی ءُ مالی جاورءَ بندوک اِنت هرچے شهرءَ لوگءُ جاگهءِ بندگءُ عمرانی کار گیشتر به بیت شهرداری درآمد گهتر بیت ایرانشهرءَ چه هما اول ملّیءُ استانی درآمداں وتءَ چمدار کرتگءُ ملکی ءُ مالیءُ زری درآمداں کمتر چمّ ۓ سک بوتگ اَنت ءُ مئے مردماں هم اے نگاه نیست که وتی شهرءَ کارءُ روزگارءُ تولیدی کار جاه جوڑ کن اَنت دانکه مردمانی اقتصادی جاور گهتر به بیتءُ شهرءِ اقتصادءَ دیم به بر اَنت همے سوب بوتگ مئے شهرءِ درآمد سک کم به بنت  انگت هما استانیءُ ملی درآمداں ایرانشهرءِ شهرداری گیشترین مالی درءُ وسیله اَنت مروچان مئے شهرءِ وتی درآمد انگت کمتر هم بوتگ اَنت پرچا که مالیات بر ارزش افزوده انگت په مئے مردمان نوک اِنت ءُ رواج نه کپتگ البت تنے وهدی ما هر چے بودجه بستگ آ سرجمءَ شهرداریءَ رس اِتگ.
 شمۓ شهرداری بارین وتی کار کنوکانی حقوقءَ ماهءِ سرءَ دات کنت؟
ما تقریبا باز پشت نه اِیں ما تا هنّو نهمی ماهءِ داتگ ءُ برے بلکے یک ماهے پشت ءَ کپ ایت بلے چو نه اِنت که آیانی سرءَ زور پر به بیت امیت اِنت مئے شهرداریءِ کارکنوک هنچو کار بکن اَنت که مردم چه شهرداریءَ راضی به بنت ءُ هنچو شهرءِ درآمد گیش به بیت.
 مردمانی هوریءُ همکاری گون شوراءَ چون اِنت؟
من په اپسوز گوشاں که کم اِنت مردمانی گمان ایش اِنت که شوراءَ آیانی رندءَ بروتءُ مئے شورایانی هیال هم ایش اِنت که مردم مئے رندءَ بیا اَنت شورا هم اے کارءَ کت نه کنت من آیانءَ حق دیاں بلے مردم باید اِنت وتی شوراءَ هر ڈول کمک به کن اَنت تا که مئے شهرءَ دراهیں پڑاں دیمروی به کنت مردم شورایانی کمک به بنتءُ شه آیاں به لوٹ اَنت وتی هر وڑیں سوجءُ سراں مارا بے بهر مه کن اَنت مردم تهنا گچین کرتن ءِ وهدءَ میا اَنتءُ رندءَ مرو اَنت مه نند اَنت آ باید اِنت مارا کمکءُ همے پیم نظارت به کن اَنت شورا وتءَ مردمانی هزمتکار زانت.
 واجه شهلی بر ما تئے منت وارین که شما اے گندءُ نندءَ بهر زرت .
من هم شمۓ منت واراں که یهت اِتءُ اے گندءُ نندءِ سوب جوڑ بوت اِت مارا شما روزنامه نگارانی کمکءُ مدت هم لوٹ ایت . شمۓ منت واراں
  

  نظرات ()
مطالب اخیر کریچءُ اگریچ - سید هاشمی فرهنگی که گروگان سیاست است بلوچستان زیبای من - لادیز بلوچستان زیبای من بلوچستان زیبای من بلوچستان زیبای من بلوچستان زیبای من - درخت کُنـار - نوروز 92 سربــــاز بلوچستان زیبای من - سرباز روستای کوهمیتگ - نوروز 92 بلوچستان زیبای من بلوچستان زیبای من
کلمات کلیدی وبلاگ بلوچی شعر (۱۱٩) شعر (۳۳) خبر (۳٠) عکس (٢٤) سید ظهورشاه هاشمی (٢۱) عابد آسکانی (۱۸) مطلب (۱٤) علی بخش دشتیاری (۱۳) سید نمدی (۱۱) بلوچستان (۱٠) مقاله (٩) تاج محمد طائر (٩) بلوچستان زیبای من (۸) صبا دشتیاری (٦) مولابکش پیک (٥) عطاشاد (٥) بهادر نادری (٥) نسرین بهجتی (٤) کریم دشتی (٤) فریدون مشیری (٤) موسیقی (٤) ایرانشهر (٤) سرباز (۳) احمد شاملو (۳) بشیر بیدار (۳) مراد ساحر (۳) سید ظهور شاه هاشمی (۳) لادیز (۳) موسیقی بلوچی (۳) ملا کریمداد کزوری (٢) جشنواره بومی سروده ها (٢) کریم بلوچ (٢) حاجی غلام حیدر قبا کزوری (٢) ماشاء‌الله بامری (٢) رفیق نواب (٢) مسلم ارجنگ (٢) عبدالوهاب ایرانژاد (٢) تنزءُ تیر (٢) سیما سردارزهی (٢) دره رودخانه سرباز (٢) عباس ریکی (٢) سید گرگیج (٢) ملاچمل (٢) اشرف سربازی (٢) مولوی عبدالله روانبُد (٢) خاش (٢) غنی پهوال (٢) طارق جهانگیری (٢) گروه رستاک (٢) ادبیات (٢) مصاحبه (٢) سعدی (٢) هوشنگ ابتهاج (٢) پرویز شاپور (٢) سهراب سپهری (٢) کاریکلماتور (٢) روز خبرنگار (۱) چابهار (۱) دامن (۱) تفتان (۱) مهدی اخوان ثالث (۱) زبان بلوچی (۱) عمر خیام (۱) روز جهانی زن (۱) سید هاشمی (۱) رودخانه (۱) ویدئو (۱) عبدالحسین مختاباد (۱) اخوان ثالث (۱) ترجمه (۱) حافظ (۱) خیام (۱) زاهدان (۱) فیلم (۱) نقاشی (۱) سیاست (۱) فروغ فرخزاد (۱) فرهنگ (۱) زبان مادری (۱) گفتگو (۱) زمستان (۱) داستان (۱) علی میرکازهی (۱) غذای سالم (۱) عمر خیام نیشابوری (۱) درخت کنار (۱) کوهمیتگ (۱) قیصر امین پور (۱) دریای مکران (۱) فتیح محمد شهلی بر (۱) جلیل عارف (۱) عبدالحکیم ملازهی (۱) میر احمد دهانی (۱) سرحد رنگ / جمءُ جاڑ: عزیز یادینی (۱) فرهنگ و زنان (۱) دختر بلوچ (۱) سرحد رنگ (۱) آزمانک (۱) یوسف انیس (۱) ارشاد پرواز (۱) منیر مومن (۱) ادریس درازهی (۱) هفته فرهنگی سیستان و بلوچستان (۱) منظور بسمل (۱) عبدالصمد امیری (۱) محمد علی هاشمزهی (۱) عبدالمجید گوادری (۱) سوزندوزی (۱) کلو اومر (۱) زیورآلات زنان بلوچ (۱) مجید عاجز (۱) جشنواره خرما (۱) گلنساء مبارکی (۱) رزاق دیدگ (۱) معماری بلوچستان (۱) شهرداری ایرانشهر (۱) محمد علی سپانلو (۱) چاکر چاکرزهی (۱) چراگ لاشاری (۱) علی اکبر جعفری (۱) سفرنامه تفتان (۱) یعقوب عامل (۱) صدیق آزاد (۱) دکتر ملک طوقی (۱) بشیر احمد بلوچ (۱) ملا فاضل (۱) م بشکل (۱) عبدالحمید ایران نژاد (۱) وسیم صادق (۱) روستای کهن هر (۱) کزوری - خالقداد آریا (۱) تفتان در میان ابرها (۱) کارواندر (۱) باغهای سرباز (۱) نخل و ماه (۱) مهتاب نوروزی (۱) نوک آباد (۱) کوه مادر (۱) امبر صبا (۱) فرهنگ بلوچستان (۱) منصور بلوچ (۱) بلوچی زبانءُ لبزانک (۱) هوشنگ سامانی (۱) غلامقادر رحمانی (۱) رسول بخش زنگشاهی (۱) موسی بلوچ (۱) دونلی نواز (۱) غلام بهار (۱) عارف شهیم (۱) عزیز یادینی (۱)
دوستان من پهره کوکار رهشون رها بلوچ رازگو بلوچ بردیا بلوچ لاشار نائی بلوچ ارتباط رضا شیرانی میراث سرباز نسرین بهجتی بلوچ و بلوچستان بلوچ و بلوچستان بلوچستان گدروزیا موسیقی بلوچستان علوم ارتباطات و روابط عمومی روابط عمومی شهرداری ایرانشهر کارتن هایی از خدایار نارویی ای مکران ای مکران روزنامه بلوچستان وب سایت ورنایان سرباز فیروزآباد ارتباط ایرانشهر عصر زاهدان2 فرهاد دستیار آهنگ بلوچ سایه بلوچ پیام بلوچ سرچمّگ جوئیگ روزدرا پلیوار محمد مختومی پرتال زیگور طراح قالب