سید نمدی

اے گپّ ءَ من بندران منّاں که من آرام کرت نه کناں په اے وارءُ بزّگیں راجءَ اگاں گپّے مه جناں یا دو گال مه نبیسّاں گڑا اے دلءِ انگراں چون بکناں پدءَ زندمانیءِ اے آسءُ انگر اگاں مه بنت بے زندیءِ ترونگل اے راجءِ زانگءِ مجگاں پهک سوچ اَنت که په منءُ تو بیگواهیءِ دلجمیں کلوه اَنت.
پشت کپت لچّهانی گپّ چوناهیگا مروچاں لچّه پربندگءَ وار هم نه رس ایت که من گیشء اے دگه کشّءُ چیلّاں نیاں ، ایشیءِ راستی ایش انت که چه 19/3/1962 ءَ رند دنیگا یک لچّهے هم من پر نه بستگ. کے زانت بلکیں سرجمیں 1963‏ءَ من دو گال هم گوشت مه کناں!
نوکریءَ پرچا یله کن ۓ؟ اگاں نوکریءَ یله کن ۓ ، گڑا چے کن ۓ؟ یک برے وتی دیمءِ کارانی گپّاں بجن که بچاراں تو کجام کجام شور بندیءِ پدءَ وتی بستگیں نوکریءَ یله دیگءَ ۓ!
من چه هر وانگیءَ یکسدءُ پنجاه دانگ جریده کرتگ که بهرنءَ دیم اِش بدیاں بلے دنیگا منءَ جوانیں مردم دست نه کپتگ اُمیت اِنت باز زوت اِش دیم دیاں۔ منی وامداری نوکیں گپّے نه اِنت آ واجهیں براتءِ بارهءَ که تو گپّ جتگ بلکیں راستیں گپّ ایش اِنت که تو هم چو که براتےءَ گلگ کرتگ ، اگاں همے رنگءَ که تو هیال کن ۓ به بوتین تئی گلگءُ ماسیت برجاه بوتگ اِت اَنت بلے راستیں گپ ایش اِنت که آ واجهیں براتءَ وتی هچ چیز چه من دوست تر نه اِنت ءُ من چه آئیءَ باز برءَ کمک لوٹ اِتگءُ آئیءَ هر وهد منءَ کمک کرتگ ءُ انگت هم منی اوست هما اِنت ، بلے من نه لوٹاں که آئیءَ چه هدّءَ گیش تنگ بکناں پمیشکا من جهد کنگایاں که همے وانگی زوت بها به بنت دانکه وتءَ چه واماں بگیشیناں۔
آ وانگیءِ گپ که تو جتگ اَتءُ گشتگ اَت که جمّاخانءُ امیری جوڑۓ کنگ اَنت آ چوشیں وانگی یے نه اِنت که منی بلوچی رهبندءَ به ترّین ایت . امیریءُ جمّا گون دگه لهتیں دسبرادراں جهد کنگءَ اَنت که هما انگریزی وانگی “THE HISTORY OF THE BALOCH  RACE AND BALOCHISTAN”   که سردار خانءَ نبشتگ آئیءَ ماں عربی زبانءَ به ترّین اَنتءُ چاپءُ شنگ بکن انت. البت کراچیءَ بلوچی اکیڈمیءَ یک بنگیجی بزاں پرائمرے جوڑ کرتگ ، په منی نزّءَ آیاں اے نوکیں بنگیجی په گونڈویں چکّاں نبشتگ بلے دنیگا مارا نه رس اِتگ
تئی درهباتیءِ لوٹوک
سید
*الله بکش جوهر ، بلوچی زبانءِ شاعر که آیی ءِ چاپ بوتگین شعرانی دپتر «گوهر کیمتی» ءُ «زهیں الماس» اَنت

/ 0 نظر / 16 بازدید