عبدالحمید ایران نژاد / نمیرانیں صبا دشتیاریءِ نامءَ

کجایے تو همبل
کجایے تو همبل ، چیءَ رپتگ ے تو؟
بلے هنّی زوت ات ،
پل اِت پرچا اَچ ما ،
ترا دژمناں مئی؟
ابیتک اِنت بے تو
اے سرزمین گنگدامیں !
تو یله دات مارا ، تو کت بے وپایی
نه پادارایں دنیا ترا را نه جلّ اِت
چیا چورو کرت اَنت تو زهگانءَ راجے؟
مرو هون شنز اَنت آزمانءِ دیدگ
گلین گلزمینءَ مرو واےءُ زار اِنت
تو هر نیمگءَ چار که ارسانی هار انت
مرو کوهءُ دریا ، اے گوچگ گیابیں
اے ترشتءُ تلاران اے کوهءُ هساراں
درو پرسیگ اَنت تئی
تو همبل کجایے ، چیءَ تو نیایے؟
اے هونواریں دژمن ،
وتی مَنّءَ بے گواهے کرتگ ترا را!
بلے شرّ بزانت اِنت ، تو بے گواه نه بئے هچ
چه تئی پاکیں هونءَ رُد اَنت اِنت دوبارگ
گلیں راجءِ پسّگ ، مزارءُ نهنگاں
ودی بیت همّل ، ودی بیت کمبر
پدا سنج جنت اِنت ، ماں آزمانءَ نیلّیں
آ دنت اِنت درواهی تئی آیگءِ هال
تو واتر کناں بئے ، پدا گلزمینءَ
چو دریاءِ موجاں ، چو سهبءِ سمینءَ
پدا شنگ بیت اِں ، تئی امبریں بو
پدا بیت اِں تازگ ، تئی چهره تئی آبرو
نه بئے هچ بر بے گواه ، چه مئی یاتءُ ترانءَ
تئی مهرءَ بنداں چو تاهیتءَ جانءَ
تئی زانت ءَ تیرے کنیں ما دوبارگ
جنی سرءُ چکّءَ جورءُ بدانی
داں هشرءَ نه گند ایت کسے چیں ندارگ
بچنڈ اتیں لاپءَ لدیگے تئی دژمن
کپات آس یے شالا سرءُ جانءَ تئیگءَ
بگش باریں چی اِنت گناه نو بلوچےءِ
که نشتگ مدامی وتی ڈیهـءُ هندءَ
تو آوار جتگ ملک ، تو برباد کتگ زند
کتگ کیدءُ زمزیل په نامردی کشتگ
وتی ملکءَ ویل کنت کجا نو بروت اِں؟
نه دیستگ کسءَ ما ، به کنت پلّه مُرزی
به کنت گپے راستیں په مئی راجءِ واستءَ
توار برز اِنت هرجا مزن کدرتانی
گوش ے گنگ اِنت دنیاءُ گوشاں چه سیه چپت
رس انت په بلوچءَ بینت چپت هاموش
اے دنیاءِ کانود ، اے دنیاءِ رهدار
او کور پهمیں دژمن ، اُو قابیل امبراه
اُو هابیلءِ هونیگ ، اُو فرعون سنگت
چه پیمءَ کن ے تو ، اے روچءَ را اندیم؟
گوں برمشءُ برانزاں نه بیت گار هچ بر
پدا کنت اِں واتر ، گوں رژنءَ وتیگءَ
پدا نگره درنزیں اداں ماهکان کیت
هز ایت اِں تهاری ، مدامی چه نورءَ
مرو جنگ اِنت پگرءِ ، مرو جنگ اِنت زانتءِ
نه تیرءُ تپنگءِ ، چو گوشتگ بلوچاں:
"تپنگ مردءُ نامردءِ هر دو سلاح اِنت"
اگاں هست ات زانگ ، اگاں هست ات مردی
تو دیمءَ درا مئی ، په مردی تو گپ جن
چه پشتءَ مه جن تو ، په نامردی هنجر
گوں کُشتءُ کشارءُ ، نه باں گار هچ بر
مئی هوں بنت اِں ، یک توپّاں ءُ هارے
چه بیهـءَ گوج انت اِں ، تئی هنڈال ءُ ریشگ
بلوچانے کسّو نه اِنت نوکیں گپّے
که اے ریکے ے زات ، چه یک پیرمردے
دوبارگ ودی بوت
گڑا تو چه پیمءَ کن ے گار بلوچاں ؟
مئی ملّاءَ گوشتگ ، ماں گالاں وتی چو:
"مه گریں منءَ را ، تئی گار بیت پد"
من سکّ مریں دهلاں ، من ترشتیں تلاران
من کوهءُ هساراں ، من آزماناں نیلیں
من لنجیں زراں من ، من گرمیں لواراں
په تو زهرءُ ماراں ، منءَ گوں مه پیڑا
منءَ گوں مه پیڑا

/ 1 نظر / 50 بازدید
Anne

گڑا حرف دوم چی تلفظ میشه؟ من تاحالا ندیدمش